वाल्मीकि मेमोरियल विद्यालयद्वारा एसईई २०८१ का विद्यार्थीहरूलाई सम्मान

पथरी अपडेट
पथरी। वाल्मीकि मेमोरियल आवासीय माध्यमिक विद्यालयले २०८१ सालका एसईई परीक्षार्थीहरूलाई बधाई, शुभकामना तथा सम्मान स्वरूप विशेष कार्यक्रम सम्पन्न गरेको छ । २४औं ब्याचका रूपमा रहेको २०८१ सालका एसईईमा ७० जना विद्यार्थी सहभागी थिए, जसले उत्कृष्ट नतिजासहित सत प्रतिशत पास भएका छन् ।

कार्यक्रम हरियाली सामुदायिक वन पब्लिक कम्पनीको सभाहलमा आयोजना गरिएको थियो । विद्यालयका अनुसार आयुष्मा दाहाल र निश्चल न्यौपानेले ४.० जिपिए ल्याएर विद्यालयको गौरव बढाएका छन् । उनीहरूलाई विद्यालयले जनही १ लाख रुपैयाँसहित सम्मान गरेको छ । त्यस्तै, ३.९१ भन्दा बढी जिपिए ल्याउने विद्यार्थीहरूलाई जनही ५ हजार रुपैयाँसहित सम्मान गरिएको छ ।

त्यस्तै विद्यालयले ३.९५ जिपिए ३ जना, ३.९१ जिपिए ९ जना, ३.८ जिपिए १० जना, ३.७ जिपिए ९ जना, ३.६ जिपिए १० जना, ३.२ जिपिए २४ जना, ३.० जिपिए ३ जनाले प्राप्त गरेका थिए ।

कार्यक्रम विद्यालयका संस्थापक नवल किशोर खनालको अध्यक्षतामा सम्पन्न भएको थियो । प्रमुख अतिथिका रूपमा पथरी शनिश्चरे नगरपालिकाका नगरप्रमुख मोहन प्रसाद तुम्वापो सहभागी थिए । साे कार्यक्रममा वडा नं. १ का वडाध्यक्ष भीम कुमार राई, वडा नं. २ का वडाध्यक्ष नैना राई, प्याब्सन नगर कमिटी अध्यक्ष सन्तोष बस्नेत, र प्याब्सन मोरङ सल्लाहकार समितिका सदस्य लेखनाथ भट्टराईको समेत उपस्थिति रहेको थियो ।

कार्यक्रमको स्वागत मन्तव्य प्रधानाध्यापक चन्द्रप्रसाद दुलालले राखेका थिए । सभाध्यक्ष नवल किशोर खनालले कक्षामा ११ का ७५ जना विद्यार्थीलाई निःशुल्क अध्यापन गराउने जानकारी दिँदै ३ जिपिएभन्दा माथि ल्याउने विद्यार्थीहरूलाई होटल म्यानेजमेन्ट संकायमा निःशुल्क अध्ययन गराउने घोषणा पनि गरे ।

कार्यक्रममा विद्यार्थीहरूले देशभक्ति गीत ‘काला पानी’ ‘सुन साईली’,राउटे र याख्खा नृत्यजस्ता सांस्कृतिक कार्यक्रम प्रस्तुत गरेका थिए ।

विद्यालयले कक्षा ८ को बोर्ड परीक्षामा समेत उत्कृष्ट नतिजा हासिल गरेको थियाे । विद्यार्थी राशी कार्की, प्रतिष्ठा खत्री, र अभिक्षा बिष्टले ४.० जिपिए ल्याउँदै गोल्ड मेडल प्राप्त गरेका थिए । ३० जना विद्यार्थीले ३.६ जिपिए ल्याएका थिए भने ८६.९ प्रतिशत विद्यार्थीहरूले उत्कृष्ट जिपिए प्राप्त गरेका थिए ।

कार्यक्रममा बोल्दै प्रमुख अतिथि मोहन प्रसाद थुम्वापोले भने, “एसईई दिने विद्यार्थीहरू, तिनका अभिभावक र शिक्षक शिक्षिकालाई म हार्दिक बधाई दिन चाहन्छु । वाल्मीकि विद्यालयले पठनपाठन मात्र होइन, अतिरिक्त क्रियाकलापहरूमा पनि उत्तिकै फड्को मारेको छ । यस्तो विद्यालय समुदायको गौरव हो, र यसको प्रगतिमा नगरपालिकाले निरन्तर साथ दिनेछ ।”

कार्यक्रममा विद्यालयका उत्कृष्ट शिक्षक तथा शिक्षिकाहरूलाई पनि सम्मान गरिएको थियो ।